三年前吾爸又過身咧，吾煞變到一个毋阿爸毋阿姆个人。四十歲碇碇，日子長迢迢，毋爺毋哀，吾實在係盡才過！吾爸五十歲，吾姆四十九歲，吾正出世，講起來吾爸吾姆也算係高壽，無過是吾做屘女个人命瑕歪，毋淨多機會佬爺哀共下過日子。扣剔吾盞學寮讀書个時節，佬吾行嫁後做人烳娘个日子，算起來吾佬爺哀共下生活个日子正十六、七年碇碇。
人過中年就殷想「爺娘想子長江水，子想爺娘無過擔竿長」咧句話。爺娘過背剔，換吾想爺哀，就來想吾細細唉个時節，待到南庄，聽个中港溪咧條水日日夜夜流過歸莊个箇故事…
吾爸係苗栗南庄个大南埔人，吾太就待大南埔哩。唐山過台灣，剎猛打拚耕山耕田淨多代，吾太之前个老祖宗待哪位？吾爸也交代个不清不楚，神桌頂項个神主牌寫來淨清楚，吾太係唐山過台灣个第十八世子孫，吾爸就係第二十世。吾淨記得吾細細个時節，淨愛問爸爸神桌項寫个「赤砂公王」、「白砂公王」係麼介意思？吾爸總係淨有耐心講古分吾聽。原來，自廣東大埔个桃花村綠竹頭下，撐船渡大海，係淨艱難个大風險，有一堆「赤砂」佬「白砂」殷漂流過來擋等船身，撐來撐去行船呀行不利。好佳在，有老祖宗跪到船頭，拜託「赤砂」、「白砂」庇佑大儕家平安渡過烏水溝，…來到台灣耕山耕田，咬薑啜醋，就愛佬「赤砂公王」、「白砂公王」請到神桌頂，愛像服侍儕家个阿公婆共樣，世世代代愛記得儕家个「本家」佬「源頭」。吾个祖公儯等吳沙 先生來，先歇到台北縣三峽，後來正緩緩个徙去苗栗縣南庄个社寮。
吾爸係西元1919年到苗栗縣南庄个社寮出世个。佢个阿公過年个時節，佬人共下打紙炮唉，不篤好爆到儕家个手，故所吾太，佢个正手三个手指碇碇，毋過耕山耕田，吃飯寫字全做得。1927年吾太過身，1928年吾公又過身，吾爸正兩兄弟碇碇，个時節吾伯十六歲，有體力有頭腦做得擔當家庭，毋過吾伯淨花哩，雖然吾太吾公薄有田產，分吾伯吃酒賭博，淨緊就沒哩。吾伯吾爸自細个時節，吾婆就攬兩个「花囤女」轉來，儕家供个細妹仔，又分人攬去做「花囤女」，客家人安到「姑換嫂」；吾伯嬤係「花囤女」，淨早就「送做堆」咧，吾伯無係淨愛佢，故所到外背花哩花哩，吾婆吾伯嬷實在嘛沒奈何！
愛分吾爸送做堆个花囤女，八、九歲碇碇去掌牛，煞分大牛牯鬪死。吾爸淨大咧煞沒錢好討烳娘。吾伯嬤淨狠噴剔油盞燈，毋分吾爸讀書，講愛省儉油盞燈个油。吾爸淨煞猛打拼，日時頭讀南埔國校受日本教育，暗烳頭，行去南庄街項（今南庄中山路）儯漢文 先生楊竹偷偷唉讀漢文。學漢文又學打算盤….後來， 楊竹 先生佬第一大个細妹仔嫁分佢。吾姆係早期南庄國校个少數女校友，頭擺頭擺淨罕得有客家个細妹仔做得著鞋去讀書。吾爸討到吾姆，討到有讀書个烳娘以外，也討到吾姐公一生人對吾爸个支持。
吾爸日語講來淨靚，算盤淨精，字寫來也淨派頭。吾姐公係日本時代林務局个工作人員，佬日本巡察本來就淨有交搏；吾爸後來熟識淨多个日本巡察，有一个鈴木先生淨欣賞吾爸，吾爸接受鈴木先生个幫助，取得日本時代賣魚仔个登記證，十八歲開始在田尾（今南庄田美村）賣魚仔，從農家子弟變成細細唉个魚店頭家。做魚店頭家一路淨順利，鈴木先生又問吾爸，想愛賺暇多錢沒？後來，鈴木先生又集資佬吾爸縢手，請到一張日據時代不簡單个「合法豬肉商」牌照。日本時代愛做合法个肉品商，不係簡單个事情！吾爸二十二歲，存到一滴个錢，就討吾姆轉屋家。吾細細仔个時節聽過吾姆講，當時行嫁个排場淨奢華盛大，新娘个妹家係客家庄个士紳；新郎个頭，有鈴木巡察做面風。吾姆講佢出嫁無係坐轎係坐烏色个車輛，自南庄街路隢一遴正駛去田尾。吾姆嫁過來以後，除了賣豬肉，又賣其他淨多个雜貨….算來算去也有賺到錢。
台灣光復後，新台幣換舊台幣。吾爸因為鈴木先生个層關係，殷分新政府尋麻煩。其中有一个新政府个某某先生日日來店項尋麻煩，吾姆愾到發毒誓：「世世代代，子子孫孫絕對不佬某某姓氏人結親家！」因為幣值大貶，囤貨不當，子女相繼出世…又堵到人和个危機，吾姐公建議吾爸遽離開南庄。吾爸吾姆徙去桃園平鎮个東勢村楊屋，吾姐公自細待過个地方。个時節，石門水庫還毋有動工，桃園縣處處係埤塘，愛用埤塘水灌溉看天田。吾爸蓄雞仔賣雞仔，吾姆種菜賣菜佬度細人崽。東勢村楊屋三步一埤五步一塘，淨很有細人崽跌落水項浸死…吾姆度等五个淨細个細人崽，一直淨愁慮。吾爸店面大生理做慣，沿街叫罵煞做不贏人。个時節，桃園淨多大陸來个人，大陸人淨了解群聚合作个方式，暇有競爭力个商業手法，吾爸自認儯人不到。吾姆看到楊屋有宗族个細人崽跌落水項浸死…殷哭殷堅持愛轉南庄待。
姐公到南庄國小學校坪唇，尋到一間屋仔分吾爸吾姆歇宿。姐公係一介鄉紳，客家庄項个紅白喜喪事、大大細細个廟會…淨多尋吾姐公經辦…吾姐公姓楊一直淨崇拜古時楊震清白傳家四知家風，「天知、地知、你知、我知」，姐公一生廉潔佬人共下也淨和氣…故所，轉南庄待，姐公庇蔭，吾爸吾姆大事化細事，細事化無事，緩緩唉行，日據時代結下个怨尤也漸漸唉清淡下來!
當時沒「節育」个觀念，吾姆殷供子，一直供了十个子女，吾一等細，係吾姆四十九歲供个。吾姆轉南庄以後，姐公做紅白帖仔个理事，淨多機會佬人儯手。後來，不係去儯手，係分人請去做「總舖師」，成為客家庄辦桌个「阿梅姊」！吾還淨記得細細唉个時節，儯等姐公、媽媽去淨多客家庄吃好事、歪事个桌席。吾姆淨伶俐，手腳淨遽，對食材淨了解，就係便宜个食材，儉省个經費，吾姆也想盡辦法佬雇請佢个頭家做面風。沒辦桌个時節，吾姆就自家做衫分細人崽穿，屋後背種菜、種蕃薯、種芋仔、種地豆、畜豬仔、畜雞鴨…維持家計。農忙个時節，就儯手打「米苔目」、「菜包」、「水粄仔」挑去田唇分庄肚个耕種人吃點心。吾姆淨煞猛，待人做事淨圓滿，接得到吾姐公个腳。吾爸到南庄龍門口个「台陽礦業」尋到頭路想入炭坑打礦，吾姆毋同意，驚吾爸入礦坑會死殆礦坑肚…後來吾爸分吾姆堅持下，只好去做外坑道个輸送工人，日日騎自行車自南庄國小騎去龍門口上班，好天落雨，熱天冷天日日共樣， 日班夜班都係騎去騎轉，就安咧，一家大大細細安定下來。
1963年「葛樂禮」風災肆虐全臺灣，南庄鄉中港溪流過个地方，歸庄唉係災情！姐公一屋人全部暫時離開南庄街項，來到南庄「上崁」吾屋家共下生活。物資不豐裕个年代，好佳在，有南庄个鄉紳李木基先生捐出李屋碾米廠个米，雖然个米分中港溪水浸泡過，煮成一大鑊一大鑊稀稀个糜，還係溫暖淨多淨多屋殼全部分水打走个南庄鄉親。毋屋毋社个人全部留到南庄國小避難，接受賑災，玻璃罋肚分水打過个醬菜，混等大水味、老鼠屎味佬碎玻璃…為到生存，大儕家還係大口大口扒飯。吃飽後，青壯个細賴人，全部去拯路拯橋，聯外个路、橋拯好，再過來就愛大家「換工」，大家儯手拯大儕家个屋舍。沒辦法「拯」，就愛遽遽搭臨時个便橋，用「流籠」遽遽解決細人仔讀書，聯外物資輸入、輸出个問題，遽遽安定生活个秩序。个良時个客家庄人情濃又淨遽烈，正幾日仔碇碇，政府个救援還沒到，南庄人用學校、用永昌宮个所在聯絡集合，淨緊恢復生活个秩序。
「葛樂禮」風颱做大水時，吾三姊牙齒發炎，兩个面頰卵發紅燒到四十零度，嘴打毋開，講話食飯全係問題，喘氣都係問題！牙痛無係病，痛到愛人命！大水正過，聯外交通還毋通，吾爸吾姆輪流背等十五歲个三姊，自南庄國小行到三灣鄉，再自三灣坐車去頭份就醫。歸路仔个鄉親都係勸吾爺哀，安多子女又堵到大水災，日子長迢迢歪過日咧，奄奄一息个毋使救…吾爸吾姆堅持一定愛救吾个三姊…个年吾爸四十八歲，吾母四十七歲，輪流背等十五歲个第三个細妹仔，佬其他个細人崽委託分風災後客家庄个鄰舍看顧…當時吾个爺哀心肝肚一定淨痛，十五歲个病人，留待背囊頂一定係淨沉重。自南庄到三灣一路行來，心情一定淨忐忑不安…後來花費當時新台幣一千个銀，救轉三姊个命，哩下吾三姊五十九歲，已經攬三个孫子咧！
吾爸吾姆一生為十个子女十分勞碌！吾普普个記得吾姆用一條布做成个背帶，背等吾去儯手佬人辦桌。早期有人供到安伢仔會送分沒供仔个人，嘛有人賣安伢仔來變錢。吾爺哀殷認為：「一枝草，一點露」，甘願窮苦，就係自家个親戚來拜託送出細人崽，吾爸吾姆還係痛惜子女。爺哀省儉分吾讀書，細細仔个時節，雖然淨窮苦，著「哭緇布」（喪家麻布）做个襯裙，著阿哥著不得个球鞋，像細賴仔樣著阿哥个衫褲…不過，爺哀會買東方出版社个書分吾讀，吾小學ㄧ年生就有自家用个字典佬削圓筆機…行筆行到咧，實在淨服自家个對吾爺哀讀書个事情安用心。
爺哀已經過背剔，吾也年過中年，感謝爺哀培養吾讀書，感謝中港溪个條水孕育吾个生命。客家庄頭擺个濃密个團結合作，因為親族家族个影響，吾還做得用四縣、海陸音講淨正个客家話….哩下試等用四縣腔，藉電腦敘說吾所知个中港溪个故事…希望客家文化个保留，不係留下「會講客家話个人」碇碇…客家人吃苦耐勞，換工打拼个同村協力个精神，晴耕雨讀培養子弟个傳統做法…希望也做得藉哩篇文字，佬關心客家个鄉親共下來思考，下一步客家人愛行去哪？哪位還係有真正同村協力个客家庄？
留言列表
